政壇：佔中正反方獲CY邀飯局
政改諮詢一直只聞樓梯響，繼本月初邀請二十六名各界人士到禮賓府出席飯局商討政改「摸底」後，特首CY梁振英將於下月十二日和十七日，再喺同一地點舉辦兩場同類型飯局，其中「佔領中環」發起人陳健民同反對佔中嘅「幫港出聲」發起人鄭赤琰，破天荒同場獲邀出席首場嘅飯局，換言之，佔中同反佔中代表將有機會首次喺CY面前「較量過招」，到時勢必火花四濺。
鄭赤琰
陳健民
還記得CY曾狠批佔中係為犯法而犯法，呢次伸出橄欖枝邀請陳健民出席，唔知陳健民會否忘記過去，展望將來呢？陳健民接受傳媒查詢時話初步傾向出席，希望爭取任何對話機會討論政改，但佢同時事前張揚到時會講解佔中嘅內容同理念，似乎有當面向CY挑機嘅意味，到時CY點接招，認真令人期待。
同樣獲邀出席飯局嘅鄭赤琰則相信，政改不能透過一、兩次會面就可以有實質討論成果。其他獲邀出席嘅仲有民主黨前立法會議員李永達，新力量網絡葉健民同浸大學者黃偉國等。
