政壇：商品例多灰色地帶 網絡槍手易「中彈」
《商品說明條例》實行至今已有一段時間，但新例就被人投訴灰色地帶太多太廣，擔心會誤墮法網。原來除咗商品可能會觸犯法例外，網絡槍手都可能隨時中招畀人告上法庭。立法會資訊科技界議員莫乃光近排收到唔少業界查詢，都係關注新例實施後對佢哋嘅影響。
莫乃光話早前請海關人員講解邊啲情況會觸犯法例，但在場人士都係聽到一頭霧水。（資料圖片）
佢話唔少網絡槍手平時會收錢幫人寫網誌，但依家如果繼續喺網上大力宣傳產品有幾好用，可能會觸犯法例被人告上法庭。又有公關公司擔心收錢幫公司寫新聞稿時，如果避免用「最多」、「最大型」等字眼，可能會被對方質疑宣傳唔夠力，因而得失客人。
早前佢就聯同業界喺城大開咗一場研討會，仲邀請到海關官員同法律界人士出席，講解邊啲情況會觸犯法網。莫乃光又話個海關人員講嚟講去，都解釋唔到有乜嘢情況肯定係犯法，淨係話唔可以評論個別例子，實際情況要上法院等法官定奪，搞到在場人士聽足個幾鐘都仲係一頭霧水。
