政壇：陳智思再講唔會選特首
行政會議成員Bernard陳智思一直被視為下屆特首熱門人選，近期再次活躍政圈，尋晚佢出席富貴黨喺蘭桂坊舉辦嘅活動時，再次講明自己唔會選特首，但講到點化解香港深層次矛盾、點樣發展房屋政策時，佢又講得頭頭是道，好似發表緊政綱咁，話佢一啲準備都無，真係無人信。
陳智思（左）話自己親戚多，隨時畀人挖到黑材料。
喺老蘭酒吧，唯獨Bernard錫身以水代酒，仲借題發揮話自己身體唔好，又要照顧家庭，點可能選特首呢。佢仲話以現時政治氣氛，自己喺泰國有八十幾個親戚，都唔知邊個喺香港有投資。如果選特首，分分鐘被人挖到好多黑材料。
雖然佢口講唔選特首，但佢都有一套施政理念，例如講到房屋土地政策，佢話其實香港唔係無地，原來全港只得百分之六土地起樓，但差唔多百分之六十係郊野公園、濕地，認為可以減少綠化地帶。呢啲說話熟口熟面，究竟邊個講過？心水清嘅讀者一定估到。
