政壇：張文光睇海市蜃樓償願
立法會前教育界議員張文光曬到一身健康膚色，原來佢今個月初同太太跟朋友一行十幾人去蒙古，喺沙漠足足逗留咗成個星期。佢話喺戈壁嗰幾日都係住蒙古包。蒙古包只會提供有限水電，最慘係沖涼時冇熱水之餘，仲要水力弱到幾乎逐滴滴出嚟咁。咁搞法真係沖咗都唔慌乾淨啦。
張文光獲當地蒙古女子送贈毛筆字，該毛筆字是以蒙古文寫的「張文」二字。
張文光同太太喺蒙古見到海市蜃樓。（受訪者提供）
佢又話每日都會搭車去唔同營地，兩公婆搭車時試過見到遠處一座白色廟前面有一群駱駝喺湖邊飲水，點知部車經過座廟時就只見駱駝唔見水。朋友就話佢哋見到嘅原來只係海市蜃樓。
佢話讀書時都聽過海市蜃樓，一直都想去睇下，所以今次見到都算圓咗個心願喇。不過如果佢發現一直爭取嘅普選原來都只係海市蜃樓，相信佢就開心唔落喇!
