特首梁振英領導嘅新政府上任年多損兵折將，先後有六人辭職或即將離開政府，撇除問責局長出缺有「替補」，其餘空缺至今仍未見有心水人選浮上水面，有建制派政黨更疑「翻舊帳」，自言曾舉薦眾多人才入政府，但幾乎全盤被打回頭，就算再有合適人選都唔會貿然推薦免得「食檸檬」，政府要一時三刻填補呢啲空缺相信已成不可能嘅任務，仲有排頭痕喇！

設計圖片及對白

五司十四局方案觸礁

政府政治委任官員過去一年接連捲入風波醜聞，先有前發展局局長麥齊光捲入「互租單位」事件辭職下台，其後有前行政會議成員張震遠因商交所爆煲辭去所有公職，接住有前新聞統籌專員鄧惠鈞、前行政會議成員林奮強、發展局局長前政治助理何建宗各有因由請辭，連同因照顧家中年幼子女請辭嘅勞工及福利局政治助理莫宜端，政府呢個「熱廚房」走吓一個又一個，認真大傷元氣。

不過，據聞政府都無乜辦法可以喺短時間內填補空缺，呢一切恩怨要追溯至新政府去年中埋班嘅實況。

話說新政府上任之初有意為政治助理一職重新定位，有港府高層曾揚言需要三、四十名政助，希望各方幫手推薦人才，不過事後因港府五司十四局重組架構方案觸礁，政助一職嘅改革亦胎死腹中，一來政助需要嘅人數大為縮減，二來建制派曾推薦嘅人才幾乎一一被打回頭，底因係部分問責局長對政黨中人有抗拒，搞到建制派中人都心中有氣。

再者，政治大環境下陷阱風波無處不在，據聞建制派都識得同港府保持「安全距離」，對於再舉薦人選加入政府都持觀望態度，換言之政府要再搵合適人選填補空缺，相信只會係難上加難，睇怕呢批政治委任官員空缺仍有一排要懸空喇！

第一手消息請下載on.cc東方互動iPhone/iPad/Android/Windows Phone Apps