「貧不與富敵、富不與官爭」，這是中國幾千年來的封建思維，指有財勢的人贏硬，弱小者必輸無疑！

客觀上，即使沒有帝制的文明社會，有錢仍是可以使得鬼推磨的，但係，公民權利在法治精神下，就再不是講錢講惡的了！

昨早，翻報，赫見各大小報章，皆有一頁迹近法輪功團體設計的廣告，原來，係向「佔中」挑機，花巨費滅佢聲嘅「幫幫香港，出聲行動」的第二次買報紙版位登聲明。

有丁兒傳播學常識的阿丙都知道，登廣告的作用，本質就是「宣揚自家產品的威水嘢啦！嘿！看到呢頁「邪教式」廣告，直情係「廣告學」之最佳反面教材。

第一，呢個廣告用的唯一相片，肯定是做了手腳的！真大忌！因呢個是鮮明典型的「政治性廣告」。凡「政治」的第一戒條，是不能造假，要有誠信，點解所用的「控訴性」圖片，唔用「原裝」的，而要做手腳的呢？

第二，成份嘢好垃圾！因任何廣告未出街前，定必審視考量針對性對象，即受眾係乜嘢人。呢頁廣告好似我依家教仔般咁教佢哋心目中嘅「客仔」用WhatsApp、facebook同埋email，唉！咪自己低Ｂ，就當人弱能啦！嚴格來說，識遊玩上述網世界嘅人，怎會不懂獨立思考，點會盲從附和大陸化的文攻武鬥那一套整人的文革劣行呢？

香港新一代仇富的原因，就是因為大多無品的有錢人為富不仁，賺盡窮人的血汗錢後，還用不義之財來欺壓民眾。唉！袋咗好多錢落佢哋個袋添！睇嚟收唔返！記得有日，聽到個茂利，話人哋係「邪」、自己係「正」時，心知，佢仲未講完的，因佢係「正XX」囉！吖！又袋錢落佢袋，算了！當施捨！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps