「貪曾」前特首曾蔭權爵士幼子Thomas曾慶淳，早前被《好報》獨家揭發佢夜蒲蘭桂坊、當街「生擒」豹妹，狼胎程度令人咋舌。記者日前喺香港菁英會就職禮上，又見到並非該會成員嘅Thomas無喇喇出現，點知好多人都當佢透明，唔知仲以為佢去錯地方兼搭枱。甚為無癮嘅佢，最終按捺不住寂寞，於眾目睽睽下主動「出擊」，向一位長腿索女埋手，猛撩對方傾偈。

曾慶淳獵艷斷正
冇人騷佢
曾慶淳一支公揸住杯紅酒周圍行，似乎想結識年輕才俊，點知個個當佢透明。

指手畫腳
曾慶淳（右）撩高挑靚女傾偈，起勢指手畫腳發表偉論。

靚女屈就
長腿靚女要彎腰遷就個子不高嘅曾慶淳，而且聽到木無表情。

《好報》早前獨家揭發曾慶淳夜蒲蘭桂坊、當街攬女癡纏，狼胎程度令人咋舌。

打招呼冇人理食悶棍

當晚喺會展舉行嘅就職禮上，城中名人雲集，接近宴會開席時間，先見到西裝骨骨嘅Thomas一支公現身，佢揸住杯紅酒，好積極咁於會場中穿插，似乎想同一眾年輕才俊打交道，但始終冇乜人理佢。

查實Thomas似乎同菁英會大纜都扯唔埋，唔知係邊個成員邀請佢出席嘅呢？Thomas慘食一輪悶棍，本來已面黑黑，心情就更加唔使講，但佢忽然精神一振，皆因眼前出現一位身材高挑、身穿白色喱士裙嘅長腿靚女。

據講呢位長腿靚女來自富家，Thomas趁住靚女身邊冇人之際，挺起胸膛一副「戰鬥格」咁，主動上前同對方打招呼，然後開始一輪嘴講個不停。期間Thomas舉起左手指手畫腳，又提起右手到胸前扮紳士。面對個子不高嘅Thomas，長腿靚女只好側側身彎低腰遷就去聆聽，仲聽到木無表情，最慘係Thomas愈講愈興奮，毫無停止嘅意欲，但靚女都有禮貌繼續聆聽，真係戥佢辛苦。

第一手消息請下載on.cc東方互動iPhone/iPad/Android/Windows Phone Apps