特首梁振英上任後經常將「穩中求變」同「迎難而上」掛喺口邊，有「梁粉」形容CY過去一年只做「穩中求變」嘅「穩」，主打土地房屋規劃工作，可惜最快都要四至五年先有成效，相信「變中求穩」將會係香港未來政治嘅出路，因此極需立竿見影嘅政策舉措為新政府挽救民望，於是向CY獻計，建議不如對準前朝政府三座大山「動手術」，為新政府闖出一條新施政血路。

最快見效嘅係回購西隧，收回東隧專營權。該名「梁粉」話政府擔心回購或收回隧道專營權要動用公帑，查實即時回購後可發債集資，預料未必要動用太多公帑，隨即可調節三條隧道收費，產生隧道分流效果，回應同解決市民過海塞車嘅困擾。

跟住改革強積金係另一座急待移動嘅大山，事關強積金一直被批評行政費高，蠶食市民供款影響退休保障，有「梁粉」一早建議把強積金變為「公積金」，包括為未有強積金嘅成年市民設立「公積金」，由政府發行專門給公積金投資嘅通脹掛鈎債券，包括港鐵、隧道同其他政府資產等，做到公營事業收益全民共享。

第三座大山就係回購領匯股份，並喺領匯一百八十多個商場，劃出一定資金比率用作扶助社企，為小商戶重拓生存空間。不過，該名「梁粉」承認回購領匯極具爭議，加上要承認前朝政府搵市民笨，所以料將阻力重重，CY對於呢個問題宜謀定而後動較為划算。

不過，「梁粉」嘅建議全部係動搖根本利益者嘅利益，CY係咪聽得入耳？

第一手消息請下載on.cc東方互動iPhone/iPad/Android/Windows Phone Apps