政壇：朱耀華兜兜轉入新民黨
近年積極開拓地區版圖嘅新民黨，由幾年前得主席葉劉淑儀一人嘅蚊型黨，現時吸吓一個又一個，已慢慢發展成中小型政黨。該黨尋日又宣布成功吸納屯門區議員朱耀華，令該黨區議員數目增至九人。負責「獵頭」嘅黨副主席田北辰話以前獨立議員好矜貴，只打民生議題，但近年爆出堆填區風波後，獨立議員明白政治同民生密不可分，如果有政黨撐腰，點都着數少少嘅。
新民黨尋日宣布成功吸納屯門區議員朱耀華。（資料圖片）
朱耀華做咗十幾年屯門區議員，未入黨前報稱獨立，但我哋翻查資料，發現佢有鋪「入黨癮」，九十年代中從政時係民協成員，但回歸後已退黨，二千年後又短暫加入過富貴黨，到底有冇再入其他政黨，真係佢自己至知。不過，原來田二少一早就知朱耀華入過唔同黨派，仲話假如佢將來退黨，只會怪自己留唔到人喎。屈指一算，該黨喺新界西已有七位議員，屯門、元朗、葵青各兩名，荃灣就靠田二少自己，照咁睇，田二少要連任都唔難。
