政壇：金管局理唔到地府物價
尋日係農曆七月十四日「鬼節」，行過街口都見到好多人燒嘢拜祭先人，一直以嚟其中一個應節笑點，就係冥通銀行印銀紙勁過晒全球嘅央行，依家一張冥幣（即係陰司紙）面值高到去一萬億美元，轉頭就賣晒，聽講剩番啲一千億美元嘅已經無人要。
《華爾街日報》好認真咁搵經濟學家探討陰間惡性通脹，媲美津巴布韋，指出問題係陰間無辦法控制進入社會嘅貨幣量，燒得紙錢愈多，通脹就愈嚴重。
講起「貨幣」點可以唔提金管局，佢哋搵埋金管局回應，難為金管局發言人好認真咁答，佢哋無收集到陰間流通貨幣規模嘅統計數據，亦無尋求監管其發行行為，由於陰間嘅貨幣政策係無監管機構，所以無力處理其通脹問題。
金管局真係答乜嘢都咁認真，呢位發言人仲話個回覆唔係咁有趣，所以要「耍個冧」。不過，個答案其實好幽默，佢已發揮咗冷面笑匠嘅本色。講真，如果金管局收集到陰間流通貨幣規模數據，仲驚。
