政壇：袁莎妮無fb一身輕
社交網站早已滲透港人生活，啱啱有最新報告話，香港嘅facebook（fb）用戶佔總人口比例冠絕全球，難怪連「佔領中環」同反佔中嘅「幫港出聲」，都要鬥攞fb嘅「Like」鬥人氣。不過，唔係人人都係fb粉絲，香港總商會行政總裁Shirley袁莎妮尋日就自爆冇fb戶口。
冇戶口冇得畀Like
話說佔中嘅發起人之一戴耀廷早前同幫講出聲嘅發起人周融喺電台節目首度交鋒時，主持人問到雙方依家有幾多人參與，換言之，即係叫佢哋「晒冷」啦，咁周融話幫港出聲成立短短幾日，佢哋喺網上就已有超過四千五百個支持者，但佔中只有一千人簽咗佔中意向書，但戴耀廷就要死撐話支持嘅方法同計法唔同，即係唔認支持者少囉。點知翌日佔中網站就多咗好多人畀Like，有人仲笑係周融幫咗佔中添！總之兩派愛鬥大，鬥搶Like。
外界一直話商界對佔中有憂慮，Shirley尋日同傳媒茶敍，席間講起佔中話題，總商會嘅會員多數係跨國及本地大企業，佢梗係反對佔中啦！於是有人問佢，有冇喺fb畀Like「幫港出聲」呀？佢聽完笑笑口話，佢冇個人fb戶口！正當大家Ｏ晒嘴時，佢即刻補充話，佢有LinkedIn戶口，無論係佢個人定係商會戶口，都歡迎大家去睇睇喎！
大家可能對LinkedIn比較陌生，但來頭不小，係全球最大嘅職業社交網絡，擁有好多商界及專業用戶。簡單啲講，LinkedIn同fb最大不同之處，係fb多數係個人用戶。咁Shirley係總商會嘅「女掌櫃」，選用LinkedIn而唔用fb都好合理嘅，喺香港咁政治化嘅環境之下，仲安全啲添，否則唔覺意Like咗人而招惹是非就煩喇！
