城中鏡：恒生借場拍戲變行善
恒生銀行總行平日已經星光熠熠，事關有好多banker都喺附近出出入入，但估唔到連夜晚都充滿星味。原來上個月美國大導演米高曼（Michael Mann）套新片喺恒生總行取景，為咗多謝恒生，電影公司仲代恒生捐咗三十萬元畀慈善機構，真係唔話得！
相信連李慧敏都估唔到借場都可以做善事。（資料圖片）
嗰幾場戲除咗有「雷神」基斯漢斯禾夫（Chris Hemsworth）之外，湯唯亦有粉墨登場。原來嗰幾晚，恒生夜媽媽都有派人到場幫手，米高曼仲話好彩有佢哋喺度先可以順利拍攝。
既然有「雷神」，再加埋恒生個靚景，套戲睇嚟都幾吸引喎！唔知恒生副董事長兼行政總裁李慧敏到時會唔會親身入戲院捧場呢？
講開又講，間電影公司一直知道恒生鍾意做善事，而為咗多謝恒生今次幫手，佢哋亦都代恒生捐咗三十萬元畀一間香港慈善機構，真係抵讚。
