城中鏡：王健林膺中國新首富
「中國首富」排名又執位！《彭博社》啱啱公布最新億萬富翁排行榜，大連萬達集團董事長王健林今年「打低」娃哈哈集團董事長宗慶后，成為新任中國首富。
除咗有錢之外，王健林亦經常做善事。（資料圖片）
王健林以一百四十二億美元（約一千一百零八億港元）淨資產，成為中國首富，至於喺亞太區富翁榜佢就排第六，全球排名就係六十六位。雖然王董做地產生意起家，但佢名下大連萬達集團嘅生意好多元化，除咗地產，仲有酒店、旅遊、文化產業同百貨公司等。例如集團上年先用咗二十六億美元收購美國第二大電影院線AMC，成為全球最大電影院線；又計劃擴充旗下購物中心，預計到出年全國就會有一百一十間「萬達廣場」喇！
王董亦經常做善事，曾經得到「最具愛心慈善捐贈個人」嘅稱號；三年前青海玉樹發生地震後，佢亦因踴躍捐款，而被中央政府頒發「全國抗震救災模範」稱號。
