好多人都會寓工作於娛樂，好似喺日前下晝四點幾，就見到坐住輪椅嘅新鴻基地產大股東郭鄺肖卿（郭老太）與員工及十幾名集團保安，浩浩蕩蕩咁到達集團旗下荃灣廣場四樓嘅大型日式百貨公司，好落力咁巡視零售業務，期間順便掃貨撐自己。

郭鄺肖卿（坐輪椅者）被香噴噴嘅麵包吸引住，一口氣掃咗十幾個。

郭老太帶住成隊兵出巡，經過嘅市民露出好奇嘅表情。

郭老太到凍櫃選購了西班牙火腿。

掃貨近半粒鐘

一直保持微笑嘅郭老太睇落精神唔錯，佢先光顧一間麵包店，指住剛剛出爐嘅麵包話：「啲包幾新鮮喎！」隨即細心選購咗十幾個麵包，由隨行員工付款。之後佢又到凍肉櫃前，聽完店員好詳盡咁介紹各款肉類後，就揀咗心愛嘅西班牙火腿，同時心郁郁望住隔籬凍櫃嘅和牛，開口問店員點賣。不過，佢諗諗吓至醒起自己唔識點煮和牛，結果都係冇買到，繼而轉往選購乾貨。佢喺百貨公司逗留咗近半個鐘，最後買到一袋二袋滿載而歸，由身邊員工幫手挽住離開。

當時店內有唔少市民正在買餸預備晚飯，見到郭老太出巡咁大陣仗，不禁交頭接耳議論一番，「呢個乜嘢人嚟o架，咁架勢嘅？」亦有人認得佢係「嗰三兄弟嘅阿媽」。

據知呢間百貨公司嘅舖位前身，係經營多年嘅另一間連鎖日資百貨店，新地收回舖位後，於今年六月底重新開設自己嘅日式百貨店，難怪郭老太咁緊張盤生意，山長水遠都要嚟巡視喇！

第一手消息請下載on.cc東方互動iPhone/iPad/Android/Windows Phone Apps