SUN搞作：打橫嚟講：浪費警力無聊擾民
香港特首不再「微服出巡」，反而，係「高調作秀」，動用過千警力，擾亂觀塘一日一夜，出席個多小時的地區集會，全場連由局長代答的問題，只得十五個。浪費咁多人力物力，勞師動眾，擾民自虐，所為何事呢？
睇番各大小傳媒，報道香港特首到觀塘落區的新聞，大多集中現場的「騷動」情況，鮮有講及鏡頭以外的細節。
特首大龍鳳的舉行地點，在功樂道的小山崗頂，也是最多人集結的地方，包括示威及警方等人數；但「山下」，由觀塘道轉上康寧道之整段路，每個街口都擺滿軍裝差人和一兩輛警車；而搭咗棚做盂蘭盛會的康寧道遊樂場內，全塞滿各大大小小型號警車。開騷的官立中學正側兩門前，警察哥哥更是肩貼肩，手挽手的滴水不過，還未計穿便裝的伙記呀！據報，今劑的「布防」，用了全港警力的三十八分之一，即三十八個警察之中，有一件嚟咗觀塘當值。喂！仲有之前一晚「守夜」，再之前的「部署」，及後，拉人返差館落口供（再無條件放人）的人手……
搞到警方咁頻撲多事，就只因這兒的特首，太受群眾注目，他的出巡，比任何一位中央領導來港接觸市民更隆重，更高格調、更具派頭、更要「保護」……
原來，除咗前日那無必要之擾民Show之外，又因特首開到口要煮死林老師，呢幾日，突然多咗好多投訴者去全港各區警署報案，落簿批鬥Miss Lam，搞到差人又多咗好多「額外事務」。
嗱！呢啲咁「浪費警力」嘅事項，將會陸續有來呀！有乜辦法制止？無！除非……哈哈！我好黑心囉！喂！由今日起，至月底，有人因鬼節到，要出關覓食放假，咁！香港應該可以靜十多天吧！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
