SUN搞作：少膽虫手記：「抹黑」之禍
「少膽虫，你成日話《爛果》點好點好，咁點解我會畀人打？」淫賤黎震怒。「吓？咁大鑊，腦細你做咗咩？」見淫黎黑眼圈仲大過熊貓眼，少膽虫即刻轉移話題。「嗰日我落街，見成班人圍住個會堂，又嗌支持，又嗌反對，我見又係宣傳好機會，咪大叫咗句『支持淫賤黎』，點不知就……」淫黎邊講邊眼泛淚光。
少膽虫心知不妙，日日歌功頌德呃腦細，今日終於出事，正當少膽虫想開口安慰，淫黎又道︰「仲有人嗌『冷靜啲』！」「嗱！腦細，我成日都話《爛果》係有粉絲嘅，終於有人開口幫你！」少膽虫自信滿滿。「幫？幫你個死人頭，個師奶叫完人冷靜啲，就即刻拎士巴拿出嚟，起勢係咁扑我！」只見淫黎雙拳緊握，向少膽虫怒目而視，渾身精力似要在少膽虫身上發洩。
「腦細，會唔會你嗌嗰陣仲做咗其他嘢？」少膽虫口震震道。「……係有唔小心掂到隔籬左右啲人。」少膽虫靈光一閃︰「腦細，咁就出事喇！你知做報紙嘅雙手多油墨，你咁樣『抹黑』人，人哋梗係嬲喇！」聽到少膽虫嘅解釋，淫黎亦無可奈何，少膽虫又過一關。
