政壇：搞搞政：啟德大票倉政黨爭崩頭
距離二○一五年區議會選舉仲有兩年多時間，但唔少政黨一早磨拳擦掌，放晒精銳兵力喺新選區上，希望開拓版圖。好似剛剛落成、位於啟德嘅啟晴邨、德朗邨就成為兵家必爭之地，由於估計人口最少達四萬人，預計會產生兩個新選區。聽聞白鴿黨、建仔同民協已先後落區插旗，望住呢個大票倉，相信各黨一定會出盡法寶，鬥個你死我活。
設計圖片
據聞建仔半年前已落區收集居民資料，又派自己友成立衞星組織，希望全方位協助當區居民。最近該黨嘅九龍西一姐蔣麗芸更帶隊落區，搭帳篷設立諮詢站，做晒居民調查，唔知仲以為係地產經紀拉客。
白鴿黨近月亦派出四名新人落區工作，組成「啟晴德朗工作隊伍」，主打幫助小業主成立業主立案法團，希望藉法律知識打入啟晴邨、德朗邨。但工作隊伍將該黨標誌放得有咁細得咁細，莫非佢哋都覺得自己黨個白鴿標誌冇公信力兼趕客？
最遲落區插旗嘅民協就使出一招「免費上門驗樓」，不停上門檢查有冇漏水。消息話，由於最近成日打風落雨，民協就成為熱門求助對象，單憑一招就遲來先上岸。相信遲啲等多啲居民入伙之後，幾大政黨嘅競爭將愈來愈激烈。
