政壇：周一鑊唔開會卿姐抽秤
有「每周一鑊」之稱嘅平等機會委員會主席周一嶽，尋日接受立法會議員劉慧卿網台訪問，期間講到少數族裔兒童同殘障兒童嘅教育問題都係平機會重點工作，但就畀卿姐質疑，點解佢唔出席聯合國召開嘅關於兒童權利嘅會議。周一鑊解釋，話自己上任冇幾耐，又話唔想離開香港咁多喎。唔通周一鑊怕被人話佢好似貪曾咁用公帑遊埠？如果係咁，就真係好驚唔驚、應做唔做喇！
周一鑊畀劉慧卿質疑無膽喺聯合國批評港府。（資料圖片）
聯合國九月召開一個關於兒童權利嘅會議，卿姐都會出席，但身為平機會主席嘅周一鑊就缺席。卿姐話平機會唔去真係好奇怪，質疑周一鑊係咪冇膽喺聯合國批評政府。周一鑊就話自己上任冇耐，冇咁快出席國際會議，加上佢下月底至十月初會去中東出席一個人權論壇，所以唔想離開香港咁多喎！
周一鑊一方面話政府關於少數族裔同殘障學生嘅政策行唔通，一方面又唔肯去聯合國反映問題，搞到卿姐都質疑佢放軟手腳，要苦口婆心咁同周一鑊講︰「好心你發吓力啦！」
