政壇：豆腐渣立會又水浸
添馬艦立法會大樓入伙兩年來甩漏連連，幾乎成座大樓都被揭有問題，就算秘書處修修補補，甩漏都係無休止。尋日上晝港島區一場驟雨，就再次暴露新大樓建築甩漏，事關當時竟然有雨水滲入議員辦公室，職員要出動水桶盛載滴落嚟嘅雨水，「豆腐渣」三個字可謂當之無愧。
黃毓民嘅立法會辦公室滲入雨水，要用多個膠桶載水。（受訪者提供）
今次肇事嘅係位於十樓嘅黃毓民辦公室，話說朝早十點幾，有議辦職員發現議員房內近玻璃窗嘅天花位置出現滲水，雨水好似小型「瀑布」咁不斷流入辦公室，佢哋即時攞咗七個水桶出嚟載水，同埋致電秘書處投訴，好彩枱上文件同地下電線冇被滴濕。
秘書處派人調查，發現原來天台當時正進行例行檢查同維修工程，先搞到啲雨水順住大樓玻璃流入議員辦公室。雖然秘書處聲稱師傅已修理完畢，但由於尋日下晝冇再落雨，所以係咪真係整番好，就要等到再落雨先知嘞！
