中環商業中心地段寸金尺土，食餐晏仔都辛苦啲，又貴又多人，打工仔最想公司提供員工餐廳，舒服兼平啲。渣打銀行最近翻新德輔道中總行部分樓面，不惜「揼本」增設員工餐廳，睇嚟渣打香港行政總裁洪丕正都好體貼啲員工喎！

渣打銀行不惜「揼本」增設員工餐廳，睇嚟洪丕正都好體貼啲員工。（資料圖片）

呢間員工餐廳名為「zone.d」，個名幾易讀，原來仲有三重意思添！聽渣打解釋，zone呢個名同觀塘渣打銀行中心相同，後面個「d」字，係代表德輔道（Des Voeux Road）總行；成個名一齊讀，普通話諧音係「兄弟」，粵語諧音係「鬆啲」，寓意員工可以間中relax下，叉足電再搏殺過。

zone.d所在位置係總部M層，原本係優先理財中心，依家搬咗去下一層，客人從德輔道中一入銀行就見到。

餐廳由Simply Life提供餐飲服務，雖然無得明火煮食，但係多咗個地方休息，員工梗係開心喇！途人經過見到，仲以為中環又開多間新餐廳添！

zone.d已於八月一日開放畀員工使用，尋日就第一次用嚟搞新聞發布會，主要講渣打嘅個人人民幣業務，渣打方面仲好有心思，特別整咗好多印有人民幣符號嘅茶點同咖啡招呼傳媒添！

第一手消息請下載on.cc東方互動iPhone/iPad/Android/Windows Phone Apps