政壇：黨友為田二少提早慶生
雖然下星期一先至係新民黨嘅立法會議員「田二少」田北辰六十三歲正日生日，但由於佢將會出門，同太太去加拿大溫哥華旅行，當日唔可以返立法會同辦事處一班同事慶祝生日，於是大家尋日就買定個大生日蛋糕預先同田二少慶祝。田二少話自己一生人中，冇乜幾何有機會提早慶祝生日，所以當啲同事捧個生日蛋糕出嚟、唱生日歌畀佢聽嘅時候，都覺得相當驚喜。
新民黨主席葉劉淑儀同其他黨友向田北辰送上生日蛋糕。
怕食太多變肥仔
田二少之後去新民黨開會，早佢兩日生日嘅主席葉劉淑儀同其他黨友，又向佢送上生日蛋糕，搞到田二少喺幾個鐘頭之內連續食咗兩個蛋糕。
老實講，佢喺年初至今，由當選港區全國人大代表、兩個乖女先後出嫁，到尋日預祝生日，一共食咗五個蛋糕，擔心自己因為食得太多變肥仔喎！
佢話唔少同事同黨友除咗希望佢平日瞓多啲，唔好食咁多肥膩嘢之餘，仲叫佢唔好成日「要求太高」，費事自己辛苦。有啲咩生日願望？佢就喺社交網站大賣關子，睇怕佢都係想到正日先揭盅喇！
