政壇：黃靜文出山做CEO
中華廠商聯合會明年慶祝成立八十周年，聽聞佢哋將會大搞，除有北上訪京團外，仲會捐一千萬元畀一間本地大學，總之大小活動陸續有來，會長施榮懷話好彩請到政制及內地事務局前副局長Adeline黃靜文出手幫忙，相信以佢嘅能力一定勝任呢個位。返咗個半月工左右，Adeline話感覺到做商會無咁多掣肘喎！講番轉頭，原來喺政府裏面要顧及好多方面，外人真係好難理解。
設計圖片及對白
施榮懷出手「獵頭」
做咗政府二十幾年嘅Adeline退出熱廚房後一年，上個月重出江湖，擔任廠商會行政總裁。佢話本來諗住退休歎世界，但經過施榮懷多番游說下，終於決定出山。
負責「獵頭」嘅施榮懷話廠商會有四百幾名員工，總裁呢個位一定要搵有能之士，自從請到Adeline嘅消息傳開後，先後收到幾十個電話，大部分人都好羨慕佢請到高手相助。咁又係，Adeline原本係高官，基本上三餐唔憂，願意出嚟捱世界嘅人唔多，施榮懷講笑咁講，話可能同自己頭髮多啲、比較有吸引力，所以先成功請到Adeline。
施榮懷份人咁風趣，唔知係咪吸引力之一呢？佢講話自己頭髮多啲，好明顯係衝住Adeline嘅前老闆、政制及內地事務局局長譚志源而來。
Adeline話，其實商會同政府都咁好做，但商會做嘢，所有會董都一條心為商會，唔止無咁多掣肘，最大分別係「唔會有人阻你做嘢」，因為喺政府返工，唔止要顧公眾觀感，連各政府部門嘅諗法都要考慮埋，既要顧慮會唔會被公眾鬧，亦要諗吓政府有冇人唔like。
聽佢咁講，似乎佢當年喺官場都受唔少氣，令佢做唔到嘢。不過唔緊要啦，依家佢已搵到份好工，又可以做自己想做嘅嘢，簡直一箭雙鵰啦！
