全國人大常委范徐麗泰尋日同醫院管理局前主席「金刀梁」梁智鴻醫生，齊齊出席香港移植運動協會嘅活動拍檔做「棟篤笑」，出力呼籲市民支持器官捐贈，仲講笑話：「冇稿讀做棟篤笑真係好，好難得奢侈地亂咁講嘢。」唔通范太見社會撕裂得好緊要，唔想再火上加油？

范太（左）同梁智鴻醫生粉墨登場，大玩「棟篤笑」。

曾經捐腎救女嘅范太就語重心長咁話，自己擁有好多嘢都不值一提，但係當失去重要嘅嘢就要識珍惜，希望大家珍惜所擁有喎。佢身邊嘅金刀梁隨即和應，仲話「埃及政局混亂，香港每日都風風雨雨」，在場人士唔知係咪意會到講緊梁振英政府日日都咁多新聞呢，個個即刻拍爛手掌，之後佢先兜番底話其實講緊天氣，話：「你見今日都好大雨啦！」在場者又再拍爛手掌。睇嚟第時金刀梁退休都可以做「棟篤笑」喎！

第一手消息請下載on.cc東方互動iPhone/iPad/Android/Windows Phone Apps