一直是非纏身嘅發展局局長「波波」陳茂波終於可以放長假！尋日佢做完呢個月最後一次「鍵盤戰士」之後，今日起放暑假兩個禮拜，暫別繁重工作抖下氣，到九月初先至復工，至於會唔會去邊度抖暑？佢嘅新聞秘書就話唔知啦，希望「波波」可以藉住今次嘅長假，泵番脹個被插到漏晒氣嘅波啦！

陳茂波暫時唔做「鍵盤戰士」，停工兩周。

波波喺舊年七月底上任局長以來一直多災多難，先係佢嘅家族被揭發經營劏房，之後捲入醉駕醜聞，早前佢太太又被指擁有新界東北嘅農地，涉嫌有利益衝突，近期更黑到撞車入院，唔知係咪因為咁所以決定要放兩個星期假抖下，佢嘅網誌亦會停工，到九月八日先再會。佢尋日發表放假前最後一次網誌，提及喺雨季要鞏固斜坡，睇嚟佢都要趁今次放假鞏固一下。

第一手消息請下載on.cc東方互動iPhone/iPad/Android/Windows Phone Apps