城中鏡：鄧家彪4歲囡囡受歡迎
立法會勞工界議員Bill鄧家彪之前講過，話會趁立法會放暑假，抽十日陪太太同四歲囡囡去斯里蘭卡玩，諗住睇鯨魚。但點知夏天係冇鯨魚睇，所以屈就睇海龜。不過，經過呢個旅程，阿Bill話原來睇海龜都好好玩，因為人哋嘅保育工作做得好，就算部分海龜因幾年前南亞海嘯而傷殘，當地嘅海岸公園都將佢哋好好飼養，所以囡囡睇得好開心咁話。
一班斯里蘭卡小男孩眼金金，搞到鄧家彪（前右）要攬實囡囡。（受訪者提供）
本身長壽嘅海龜點解都要特別保育呢？阿Bill話正因為佢哋長壽，所以斯里蘭卡人諗住食得多，自己都長命啲。不過，佢哋成日咁食，反而個個膽固醇超標，命仔反而會短啲，認真諷刺！而海龜就係因為咁，變得愈嚟愈少。
不過，佢話成個旅程令佢最難忘嘅，係佢嘅囡囡好受斯里蘭卡小男孩歡迎，個個都眼甘甘咁（目及）實佢個女喎。怪唔得佢要攬到囡囡咁實啦，唔知將來佢係咪又係一個呷醋外父呢？
