城中鏡：將做爸爸 升呢主席 梁宏正
新任菁英會主席Clarence梁宏正可謂雙喜臨門，除咗自己升呢做主席外，太太也懷孕三個月。首次做爸爸，Clarence心情興奮，未知肚內BB的性別，佢話仔女都無所謂，仲講笑話佢家族近年生產埋嬰兒及童裝衫，不論係男B定女B，都大把靚衫着喎！
梁宏正（右）登上菁英會主席寶座，身為爸爸嘅梁君彥倍感自豪。
廖偉麟（右）置業有道，當然要同莎莎女婿陳振邦分享心得。
「樓神」進擊美日
菁英會早前喺會展舉行第六屆執委會就職禮，冠蓋雲集，Clarence嘅爸爸、立法會議員梁君彥專登嚟撐個仔，Clarence太太張曉君就坐喺台下，為老公打氣。一眾菁英兄弟知道Clarence就快做老竇，爭住碰杯恭喜。香港青聯主席霍啟剛亦快將升任做爸爸，兄弟都戥佢開心，齊豎拇指讚叻。
轉個頭撞到有「樓神」之稱嘅廖創興家族後人Jeffrey廖偉麟，佢靜觀市道半年後，近日又再出擊，睇準日本及美國房地產，打算斥資六至十億港元掃貨。佢話日圓近月大幅貶值兩成，唔少商舖變得超抵買，單係收租，都有十厘回報。過去幾個月，佢已頻頻飛日本睇舖，做足功課，當中以大阪商舖最吸引，貪佢唔似東京咁，容易發生地震。
廖偉麟日內將飛往當地掃舖，之後再會去美國加州同三藩市買舖，專攻銀座式商場。咁香港物業呢？佢話係時候入貨，月前斥資兩億多港元，分別購入地舖及三千呎寫字樓，一於人棄我取喎！
