政壇：搞搞政：空群選立會 白鴿鬼打鬼
雖然二○一六年立法會選舉辦法同選區劃界亦未有定案，但各黨派已開始作定部署。其中白鴿黨近日就通過咗一張重點培訓八人名單，仲多過該黨嘅現任議員人數，即係唔多現實發緊夢啦。預計呢八隻中鴿同乳鴿，以至該黨幾位年過六十都唔肯退休嘅老鴿，勢必爆發一場腥風血雨嘅立會搶位戰。
設計圖片及對白
上屆衰貪心輸凸
白鴿黨喺舊年立會選舉衰貪心，結果輸凸，但根據黨內部通過嘅疑似一六年立會選舉名單，就顯示該黨未有吸取教訓，繼續高估自己實力。根據呢張名單，將重點培訓「老鴿」陳樹英、「中鴿」葵青區議員尹兆堅同「乳鴿」元朗區議員鄺俊宇參選新西，意味「超老鴿」李永達已鐵定唔會再參選，但白鴿黨舊年喺該區派出兩張名單都輸晒，今次仲想加碼派三隊參選，真係笑大人個口！
新東嘅名單顯示該黨有意派出中鴿蔡耀昌同做過廉政公署調查員嘅乳鴿林卓廷出選，好似比上屆收斂咗，但呢張名單並未計算角逐連任嘅議員，如果老鴿劉慧卿決定繼續選，佢哋三個遲早會喺新東互相逼死。
至於三隻南區乳鴿區諾軒、柴文瀚同羅健熙，前兩個會競逐喺港島區出選，後者就有意出戰超級區議會，但如果黨內三隻老鴿單仲偕、鐵頭仁同涂謹申拒絕退休，呢三隻乳鴿就肯定點培訓都飛唔起。
九龍東同九龍西方面，名單上就完全無人選，意味上屆首次當選立會議員嘅兩隻中鴿胡志偉同黃碧雲，喺黨內唔會有人競爭。
