政壇：陶君行轉性教和平抗爭
社民連前主席陶君行先後落選區議會同立法會後，近排致力發展華人民主書院，最近佢哋就搞咗個「非暴力抗爭」訓練課程，教人喺面對挑釁同衝擊時點樣應對，明顯係為明年嘅「佔領中環」行動做準備。不過陶君行過往十幾年來最出名嘅係激，莫非佢係用自己過去嘅表現嚟作反面教材？
陶君行強調，工作坊同佔中無直接關係，而有關課程亦係唔收錢嘅。（資料圖片）
呢個非暴力抗爭訓練課程工作坊有十二期，華民書院今個月初已聯絡各方泛民人士，包括佔中發起人戴耀廷、學民思潮召集人黃之鋒等，希望佢哋可以參加。陶君行強調工作坊同佔中並無直接關係，又話有關課程係唔收錢嘅，絕對無意藉佔中發財。
強調課程唔收費
陶君行由大學時代，以至加入白鴿黨同其後有份成立社民連，一向以激進聞名，由佢主講非暴力抗爭掂唔掂呢？佢強調自己過往的確係激啲，但同佢開班授徒冇衝突喎。佢又話工作坊會由學員輪流飾演警察、挑釁者同示威者，透過角色扮演講解點樣面對警方嘅水炮攻勢、畀警方抬走時應該點做等，呢方面啲經驗，佢絕對大把啦。
