政壇：高達咒再有惡菌襲立會
添馬艦新政府總部同新立法會大樓前年新入伙時，喺多處嘅熱水爐同喉管驗出有退伍軍人菌，主因之一喺有關熱水爐成日無人用，孳生惡菌，連累有長期病患嘅前教育局局長孫明揚染病。不過位於立會五樓嘅議員浴室就完全無菌，原因係當時仲係議員嘅「高達」李永達，成日喺五樓健身室用跑步機跑步，之後到浴室沖涼將乜菌都沖走晒。高達日前接受電台訪問就話，據聞佢落選無得再用有關立會設施後，好少議員會喺該處沖涼，隨時重新孳生惡菌，叫秘書處得閒就搵專人去驗下。
高達又話近年佢養成跑步嘅習慣，最主要原因係想減肥。佢話想當年，自己同個別黨友成日畀人叫做肥仔，令佢下定決心做運動減磅，以前做議員時每周可以跑到三至四次步，依家要落街跑就有啲唔方便，最後都係決定畀錢到灣仔區嘅健身會所練。
講起跑步，原來高達都有一套哲學，佢話每次跑步大概會用成個半鐘，首先會先慢行十分鐘，之後再快速跑四十至五十分鐘，最後就會做番啲拉筋動作。
