政壇：「社運俠侶」戀愛大過天
本港社運人士楊匡尋日再同新婚太太、內地維權人士劉沙沙孖公仔咁出現喺觀塘康寧道遊樂場附近。楊匡手挽一個疑似女裝手袋，同劉沙沙十指緊扣咁合照、談天，大家唔好誤會，佢哋係到場支持其他喺特首舉行地區論壇外示威嘅人士啫。不過，就尋日所見，呢對社運嘅「神雕俠侶」的確減少咗以往做社運時嘅激情，莫非佢哋依家戀愛大過天？
楊匡（左）尋日同新婚太太劉沙沙喺示威現場晒恩愛。
其後論壇完結無耐，楊匡同劉沙沙又繼續形影不離咁出現喺觀塘警署報案室，話要支持喺有關論壇外因示威被警方拘捕嘅人士喎。楊匡話自己依家喺香港唔會行得咁前，主因係要同劉沙沙返內地宣揚保釣同維權問題，所以喺香港唔可以惹任何麻煩，否則想返內地都難咁話。
唔通就係因為咁，呢對新婚夫婦鬼咁開心同甜蜜，不時有講有笑，似乎冇乜煩惱，同示威嘅場面格格不入，的確唔係行喺前線囉！
