政壇：鬍鬚曾攝位曝光
特首CY梁振英尋日喺觀塘區舉行第二場論壇，仲帶埋喺問責局長中民望最高嘅食物及衞生局局長高永文一齊去。
設計圖片及對白
去到觀塘，梗係要講番啲當區嘅發展，例如起動九龍東計劃，CY嘅開場白都有提及，但勢估唔到冇跟佢落區嘅財爺鬍鬚曾竟然喺佢嘅個人網誌大講特講。明明主場係CY，鬍鬚曾嘅網誌內容撞到應一應，唔知佢係咪想乘機抽CY水，抑或想攝位曝光呢？
照抄計劃詳情
鬍鬚曾喺網誌話，放假前探訪起動九龍東辦事處，聽取發展局同事介紹起動九龍東計劃、啟德發展區同觀塘市中心重建項目嘅最新進度，又去咗啟德郵輪碼頭天台花園欣賞維港兩岸景色。之後佢搬咗一大堆數字出嚟，由商業核心、安達臣路發展計劃與觀塘市中心同牛頭角下邨重建計劃完成後，可以提供幾多單位、觀塘海濱長廊，以至交通網絡，就連經常被評為臭氣沖天嘅啟德河都講埋，佢話有關部門正研究點樣改善啟德明渠嘅氣味同水質問題，希望將來可以喺該處引入合適嘅水上活動，將啟德河發展成濱海區，甚至等市民可以喺嗰度欣賞龍舟競渡。
簡直係大包圍，但係佢仲驚死自己講漏咗，話若果市民想更了解啟德嘅未來發展，可以睇睇呢個「概念總綱計劃3.0」，可以從中了解整個啟德發展區嘅規劃概念同目標。老實講，佢篇網誌都係抄資料出嚟嘅，若果一早睇咗個計劃詳情，咁佢篇網誌咪係廢話，睇唔睇都罷啦！
