SUN搞作：少膽虫手記：白色巨塔
「少膽虫，你封筆啦。」淫賤黎如是說。開頭少膽虫只當講笑，乾笑幾聲：「哈哈，腦細你真係風趣呀！」「唔係，你真係唔好再寫嘢喇！」淫賤黎好堅定咁講。少膽虫晴天霹靂，雙腿不自覺跪低：「腦細！點解會咁？」「只可以話你造假率有問題。」淫賤黎冷冷地說。
「如果我造假率低，點解壹全霉總體成績又咁高？」少膽虫極力抗辯，但淫賤黎仍不住搖頭。「你知唔知咩係白色巨塔呀？」少膽虫只道不可顯示自己無知，即刻答：「哦！白色嘅，好大座塔o架嘛！哎呀！」淫賤黎突然一隻肥腳伸過嚟，將少膽虫伸咗落地下。
「垃圾！有人投訴你，話你造假率都係造假！」淫賤黎將腳放喺枱上。「點……點會？每一篇新聞我都好用心去作！」「用心作就會夠假嘅咩？」淫賤黎爆出一句好似幾有哲理嘅話。「你知唔知點解我要提白色巨塔呀？因為係我哋壹全霉一貫新聞取材嘅好地方！」
「係係係！咁究竟喺邊度呢？」少膽虫卑躬屈膝咁請教。「跟我嚟！」淫賤黎打開身後房門，一手將少膽虫拋入去，剛剛好頭頂浸入水中。
「同我慢慢消化晒佢！」淫賤黎指住白色嘅坐廁，向着沾上一身異味嘅少膽虫大嗌。少膽虫從廁所水中抬頭，終於領略到壹全霉作新聞嘅不傳之秘。
