Sun奇古怪：Sun潮語：【出老解】
潮語「出老解」，其實即係出動駐港解放軍部隊咁解。唔知點解香港人講嘢好鍾意加個「老」字喺前面。有時係代表相熟，例如老陳、老張，係有老朋友嘅意思。但係有時連地名都會加個「老」字，例如銅鑼灣潮語會叫「老銅」，尖沙咀潮語會叫「老尖」等等。加個「老」字好似加咗啲親切感一樣。可能香港有啲人真係覺得同解放軍好熟，所以最近喺網上出現咗「出老解」呢個潮語。
埃及局勢一發不可收拾。支持前總統穆爾西嘅穆斯林兄弟會嘅群眾，同反佢嘅群眾互相武鬥，造成多人死傷，暫時掌權嘅軍隊開槍鎮壓穆爾西嘅支持者，造成多人死亡。有好多唔知頭唔知路嘅港喱，將呢單嘢同六四天安門事件相提並論，認為開槍鎮壓嘅軍隊就係十惡不赦嘅大壞人，並喺網上高調譴責埃及軍方。佢哋有所不知嘅係，埃及人民辛苦推翻嘅穆爾西政權，雖然係由普選產生，但係佢隸屬嘅穆斯林兄弟會，其實係打算將埃及變成一個穆斯林國家，以宗教治國。自從穆爾西上台之後，不斷實行白色恐怖，打壓傳媒同異己，摧毀法治系統。執政一年，埃及人民始知「中伏鳥」，所以喺今年六月尾上街，進行全國性嘅示威，最後喺軍方協助下，推翻咗穆爾西。但係穆爾西心有不甘，叫支持者上街，佢嘅示威者仲四圍開槍攪亂埃及。埃及軍方迫不得已先出動軍隊武力清場。成件事由六月尾開始發展到今日，再睇番七月一日有遊行示威嘅香港，唔知大家又有咩感覺呢？到底香港有冇需要「出老解」嘅一天呢？
到底會唔會真係「出老解」？又會唔會有鎮壓？大家可以從駐港部隊最近嘅演練，同埋唐英年喺特首選舉期間踢爆梁振英喺行會講過嘅說話裏頭，自己猜測。「出老解」又好出乜都好，香港已經陷入嚴重混亂，解鈴還需繫鈴人，望某人可以收手，放過香港吧！
