政壇：搞搞政：麥美娟闖白鴿地頭挑機
葵青區下大窩口選區一向係白鴿黨嘅地頭，建制派屢攻不下。工聯會立法會議員麥美娟最近殺入該區開設議員辦事處，尋日搞咗個盛大開幕禮，仲邀請民望高嘅食物及衞生局局長高永文主禮，莫非佢有意「燒鴿」，為兩年後嘅區議會選舉鋪路？但佢就話只係想擴展服務，下站會去埋青衣同屯門開辦事處喎！
設計圖片及對白
講番辦事處開幕，高永文致詞時同麥美娟互戴高帽，狂讚對方喺醫療政策問題上跟得幾足，做咗幾多工夫，而麥美娟亦唔放過呢個機會向高永文爭取長者牙科免費服務同興建食環署街市，認真蠱惑。
話說開幕禮前，高永文聽到有表演者唱「明天會更好」竟顯得好陶醉，莫非佢覺得依家政府呢個「熱廚房」好難捱，所以好有共鳴？佢就話每逢聽起勵志歌就有啲忘形。對於依家社會嘅爭拗，佢話如果呢啲不同意見都係為香港好嘅話，都會係好聲音喎！
