政壇：丘文俊佔中單張冇津貼
最近有傳言話政府要打壓佔領中環行動，咁啱我哋又聽聞新民主同盟沙田區議員丘文俊因為工作報告呼籲市民參加佔中，而被區議會拒絕佢申領部分宣傳品實報實銷嘅津貼，莫非反佔中嘅傳聞係真嘅？但據講其實係有關單張印咗新同盟嘅兩句口號，涉違反涉及宣傳政黨嘅規定，所以被拒申領津貼。
事緣丘文俊早前製作今年一月至七月嘅工作報告，結果被拒絕津貼其中兩頁，理由係該兩頁印有新同盟嘅「民生無小事，民主要堅持」嘅口號，涉及「宣傳政黨」。丘文俊話新同盟又冇攞專利，點可以因兩句口號就話佢哋做宣傳，所以懷疑呢個只係政府反佔中嘅藉口。
我哋向其他區議員查詢，都冇一致講法。據講區議會規定議員宣傳品必須同區議會工作有關，否則有權拒絕發放津貼，一切以當局作準，區議員好難捉摸咁話。
