政壇：唐唐偕愛女Shopping好溫馨
政府高官最近忙於落區同拆解連串政治炸彈，相反前政務司司長唐唐就無官一身輕。前日下晝見佢偕女兒去中環ifc間超市掃貨，起初二人專攻日本北海道食品，之後就喺超市入面四圍逛，睇吓有乜其他心水食品。期間佢哋耐心挑選心頭好，女兒更曾半蹲落嚟左揀右揀，前前後後二十分鐘就畀錢離開，兩父女一人拎住一袋戰利品，加上佢哋臉上滿足嘅笑容，就知道買嘢買得幾咁開心。
唐英年（左二）同女兒（左三）喺北海道美食專櫃研究。
其後唐唐同女兒行入一間護膚品店，但就冇收穫，行咗一陣後就離開。當唐唐等候座駕接載離開前，有一對路過嘅年輕男女要求同唐唐合照，唐唐亦有求必應表現和善，隨後先同女兒一同乘座駕離開。
