潮語「政治宅」即係宅男嘅一種，呢種宅男嘅生活習慣同其他「御宅族」其實都係相差無幾。佢哋除咗人生四大工事包括吃、喝、拉、睡外，大部分時間都係用喺上網，遊走於各大討論區、論壇同社交網站。其他日常社交當然較少，外表亦同一般宅男無異。唯一不同嘅係「政治宅」係主要沉迷政治方面，佢哋上網主要係流連於關於政治議題嘅網站或群組，不斷瀏覽最新本地或國際時事資訊，同埋會不眠不休地同人網上筆戰辯論。「政治宅」嘅論述水平高低並唔係重點，最緊要係有回應，同有冇人繼續同佢哋爭辯落去，呢個亦係佢哋嘅生存動力。呢班「政治宅」乜嘢年紀乜嘢政見都有，甚至有啲深具愛國愛黨思想嘅「政治宅」，索性做埋五毛打手，為國家穩定獻出一分力。
以前主權移交初期，董伯伯嘅時代，佢老人家成日講唔好將啲事政治化，又話香港好多嘢都太政治化，唔係市民所想。後來，唔知係咪政治化搞到佢對腳政治化，令到董伯伯腳痛落台。不過，唔知佢睇到今時今日佢愛將做咗特首之後，將香港搞到所有事情都政治化之後，會有咩感想？近一個月來，林老師事件愈鬧愈大，並且高速政治化。連一向聲稱政治中立嘅公務員團體，唔知點解都政治化地捲入呢場風波。加上過去星期日特首落天水圍區，成班社團人士夾道歡迎，並以睇場式方法對付在場嘅反對人士，連社團都政治化起來。香港即將進入全民政治化時代，亦印證一句至理名言：「你不理政治，不代表政治唔會搞你。」就算你係一個宅男，終日活喺網上世界，有日你都可能政治化成一個 「政治宅」!
不過叫得「政治宅」，都有一個特點，就係等好似一啲武術指導，曉講唔曉做，網上吹到起水花，真正行動小喇叭。即係網上講到天花龍鳳，吹水就叻，一到實際行動要上街做嘢抗爭就縮埋一舊，繼續匿喺屋企做隱士。不過，最近好多膠官甚至特首自己都喜歡寫網誌，講到點點點又點，但喺現實世界遇到記者質問就：「唔回應、唔記得、唔想講!」莫非佢哋個個都變晒「政治宅」？
第一手消息請下載on.cc東方互動廣告人、網台主持 阿東
