設計圖片及對白
政府早前由「新丁局長」環境局局長黃錦星上陣向立法會「闖關」要求擴建將軍澳、屯門同打鼓嶺等三個堆填區全軍覆沒，但政府仍死心不息，政務司司長林鄭月娥全面介入統率擴建堆填區工作，早前更宣布最快會喺明年第一季再次向立會提交堆填區撥款申請。
黃錦星陸恭蕙隨時下台
有建制派中人話，環境局呢次根本再無失敗嘅本錢，為咗同建制派連成一線，一來要做好規定進入堆填區嘅垃圾車要密封等三項法律修訂工作，二來亦要積極落區疏導當區居民不滿情緒，等佢哋對當區居民有所交代。
另有建制派中人話要有破釜沉舟嘅決心，要求主責推動堆填區撥款嘅黃錦星同副局長陸恭蕙應同建制派「滴血為盟」，即同建制派政黨政團協定共同推動擴建堆填區，有功嘅話齊齊領，如果再次「闖關」仍是鎩羽而回，就要是但一人問責請辭承擔責任喎，以示解決「垃圾圍城」困局嘅承擔，杜絕兩人懶懶閒等運到嘅心態。
話時話，電影對白都有講「非常時期用非常手段」，黃錦星同陸恭蕙敢唔敢賭呢一鋪，咁就要睇吓佢哋有冇咁嘅政治膽量喇，否則只會被建制派睇死，淪為冇膊頭冇腰骨嘅問責官員。
第一手消息請下載on.cc東方互動
