政壇：趙丹陽再次投資內地股
收到風曾因同「股神」巴菲特食過飯而揚名嘅中國私募基金教父趙丹陽，事隔多年後，透過旗下嘅基金「赤子之心資本市場亞洲」（Pureheart Capital Asia）再次投資喺中資股，而且比重由今年初嘅五成升到八成。
趙丹陽睇好嚟緊消費品股同藥業股會有牛市，所以先至大手入市！（資料圖片）
喺○八年，趙丹陽就因為中國市場冇乜吸引嘅投資機會而「撤資」，將「赤子之心」旗下嘅五隻人民幣股票基金清盤，聽聞合計資產有成二億美元！咁啱就喺同一年，佢用咗一百一十一萬美元，在網上投到同巴菲特食晏嘅機會，唔知係咪得到「股神」教路，過去幾年佢就轉攻印度，但回報就麻麻地。
不過，由今年年初開始，「赤子之心」再次將資金回歸內地，單單七個月已經有成百分之二十四回報。收到風，呢個成績跑贏晒亞洲區嘅行家呀！連趙丹陽都話對內地市場愈嚟愈有信心，事關內地股市經歷咗六年調整之後，依家已經接近歷史低位，正正係入市時機！趙丹陽重話睇好嚟緊消費品股同藥業股會有牛市，所以先至大手入市！
