許華傑急性胃炎初愈後，又遇到「猜猜我是誰」電話騙徒。（資料圖片）
日前講過中華出入口商會副會長Michael許華傑，早幾日因為急性胃炎住院三日，點知小病初愈又接到「猜猜我是誰」電話騙徒。
話說Michael收到一個操普通話嘅人來電，聲稱換咗電話號碼，叫Michael估吓佢係邊個，Michael隨即揭穿對方嘅騙徒身份，仲額外加幾句「問候」說話隨即收線。不過，Michael收線後擔心對方聽唔明廣東話，於是打番轉頭用普通話鬧多鑊，仲愈鬧愈起勁，苦口婆心咁勸勉呢位後生仔騙徒要搵份正經工做，回頭是岸。
Michael收線後，都驚訝自己點解可以咁冇修養，話可能受近期社會氣氛影響喎，仲話有教師為咗心目中嘅「正義」而放肆講粗口鬧人，佢都係「聽教聽話」所以先至會咁做。
第一手消息請下載on.cc東方互動
