政壇：油畫展變藝術家申訴會
話說日前一個油畫展喺中央圖書館開幕，點知變咗藝術家申訴大會。當日藝術發展局主席王英偉都在場，油畫研究會副會長李林先話，喺香港想搵個地方搞展覽都難，申請今次油畫展，排期等咗年幾至成事。早前西九龍文化中心舉行嘅雙年展，只獲藝發局撥款二十一萬元，與投放於威尼斯雙年展嘅資金相比，真係差天共地。
李林先大呻喺香港搞畫展搵場地好困難。
王英偉（中）聯同李秀恒（左）及林健鋒唱三簧敦促政府盡快興建藝術場地。
王英偉都認同話香港要發展創意藝術同體育，硬件同軟件同樣重要，藝發局已經好努力咁幫藝術家搵場地，但都需要政府配合。佢又坦言，香港作為國際大都會，體育文娛設施都落後於外國，真係要急起直追。至於立法會議員林健鋒同中華廠商聯合會副會長李秀恒都夾晒嘴形，話希望政府起多啲展覽設施，並加大力度推行活化工廈，予藝術家一個發展空間。三個人直情喺度「唱三簧」啦！
李秀恒本身有唔少工廈揸手，佢話因法例所限，工廈需經活化至可以合法成為畫廊，所以活化工廈有利推動文化創意，佢已盡量以較平租金租出旗下單位畀藝術人士。
