設計圖片及對白
東區兩大建制勢力建仔同工聯會新仇舊恨一籮籮，最近政府擬將東區維園同天后兩個選區改劃入灣仔選區（兩區方案），建仔同工聯會都各有意見。有資深地區人士睇唔過眼，認為呢啲舉動或多或少有政治操作之嫌，最近連元老區議員都疑睇唔過眼，直言劃界一事最緊要係以市民為力量，唔應該以自己為單位，似乎暗批有政黨政團為私利劃區喎！
罕有復出論政
政府重劃灣仔同東區區界嘅諮詢於今日結束，八十年代堪稱第一代民選區議員嘅前小學校長容馬珊兒罕有地「復出」大談劃界一事，大爆二十多年前嘅往事。佢話政府當年都諗過將東區部分選區撥歸灣仔區，但當年冇人支持，所以亦都冇提出具體方案；事隔多年後嘅今日，政府提出「兩區方案」，容馬珊兒自言倘灣仔區議會認為議員數目太少，想搵人幫手係無可厚非，但如果灣仔同東區區界維持現狀亦唔反對喎。
容馬珊兒一係唔講，一講就有的放矢，佢語重心長呼籲大家喺劃界一事，唔應該以自己為單位，要以市民為力量，最好就係落區做問卷調查，並自爆當年佢面對爭議問題都係咁落區聽取市民意見喎。
事實上，容馬珊兒突然以元老身份現身「曉之以理」，相信都絕非無緣無故，事關建仔同工聯會喺劃界一事已多次隔空過招，前者力撐「兩區方案」，後者則對呢次諮詢方式好有意見，認為政府點解唔將其他早期曾諗過嘅方案一次過擺晒上枱面等大家探討。不過，講到尾再三諮詢始終都係要有決定，容馬珊兒嘅連番說法相信都係想各方人士聽民意做決定，唔知建仔當區雙料議員鍾樹根同工聯會嘅郭偉強會唔會聽吓呢個意見呢？
第一手消息請下載on.cc東方互動
