城中鏡：洪為民剷青型Look吸睛
互聯網專業協會會長Witman洪為民趁炎夏來個「剷青Look」，將原來陸軍裝頭剷走一大「忽」，潮爆程度，同平日平實造型大相逕庭，好友爭住問：「做乜咁激！」
洪為民（右）後腦大片頭髮被剷走，莊士集團太子爺莊家彬（左）爭住欣賞。
日前喺一個晚宴見到Witman，新髮型成為全場焦點。「剷青Look」咁重口味，莫非髮型師失手？非也。個師傅已幫Witman剪髮二十年，日前提議佢不如試新嘢，佢一口答應，話口未完，髮型師手起刀落將耳邊兩側頭髮剷光，嚇到佢話：「會唔會似公雞o架？」幸好修剪完畢，型Look盡現。聽聞呢個師傅有唔少明星、名人客，是非纏身嘅發展局局長陳茂波都係佢客仔。
