立法會議員兼香港專業及資深行政人員協會會長Tony謝偉銓，早前帶隊遊馬來西亞婆羅洲熱帶雨林，一行九人展開六日五夜探索之旅，同行仲有理事鍾志平、秘書長李惠光及四位早前勝出「卓育菁莪大比拼」計劃嘅四名大學生等。

雨林內巨樹參天，單係樹根，已比謝偉銓還要高。（被訪者提供）

謝偉銓（中）與協會理事鍾志平（左一）、秘書長李惠光（左二）及一眾大學生，探索熱帶雨林。

雨林內有多種昆蟲及菌類。

初次到訪雨林，Tony做足準備，帶定強力蚊怕水同防水衣物，佢哋分別參觀浪比爾國家公園同尼亞國家公園。入到雨林抬頭一睇，巨樹參天，單係樹根已成個人咁高。植物種類出奇豐富，森林內隨處可見毛毛蟲、變色龍、如拇指般大嘅紅蟻、七彩菌類及蜈蚣等，大家都大開眼界，導遊叮囑團友千祈咪多手亂摸，否則好易掂到有毒物種。

數最刺激行程，莫過於參觀聚集成千上萬隻燕子同蝙蝠嘅石洞，洞內伸手不見五指，忽然見到一排排倒吊嘅蝙蝠雙眼發光，都咪話唔驚。咁多嘢睇，團友堅持每日行山四至五小時，帶定生果充飢。行畢全程後，團友個個渾身濕透，所以Tony例必帶定一套衫喺雨林出口更換。

馬國嘅熱帶雨林，喺百多年前曾經有獵頭族「伊班族」出現，時至今日，族人已被安置喺高腳木屋村落內，團友爭住去八卦，探頭一睇，「獵頭族」後人外表同一般馬拉人無異，佢哋唔再殺人獵頭，而係過住食飯炒菜嘅簡單生活。

第一手消息請下載on.cc東方互動iPhone/iPad/Android/Windows Phone Apps