政壇：搞搞政：建制派做鵪鶉唔講政改
「佔領中環」行動已啟動，又激發咗「幫幫香港出聲行動」嘅反佔中組織出現，但建制派活躍人物好似潛晒水，完全冇聲氣，何解？
設計圖片
我哋聽聞，有位建制派大佬最近同人勁呻，話今次中央心目中嘅政改藍圖究竟係點，未到最後一刻都唔作得準，所以佢哋費事強出頭。因為近年佢哋已經歷咗兩次集體「踢鐵板」慘痛教訓，唔想再失威。
乜嘢教訓咁慘痛？第一次咪係三年前政改「五部曲」嘅第三部曲囉！當時政府提出修改《二零一二年行政長官及立法會產生辦法建議方案》，民主派同中央展開拉鋸戰，當時建制派同中聯辦官員爭相出聲死撐中央底線，點知最後關頭阿爺突然讓步，接受白鴿黨提出嘅區議會功能界別方案，增設區議會超級議席，令政改談判一夜間峰迴路轉，喺立法會夠三分之二通過。當時有份做打手嘅建制派跟不上形勢變化，當堂呆晒。
第二次集體撞板就係特首選戰，喺選戰初段，中央明顯支持前政務司司長唐唐，某政界高人透露，當時建制派大佬都收到柯打，話要出席唐唐嘅造勢大會，仲話「一個也不能少」。嗰場政商娛樂界猛人齊集嘅造勢大會，墟冚場面令人難忘。但佢哋勢估唔到中央會陣前換將。一眾接柯打挺身撐唐嘅建制派方寸大亂，被人問起究竟支持邊個，都唔知點樣自圓其說，冇晒威信。兩次經歷太慘痛，今次仲唔睇定至出聲？
