政壇：王英偉順番公務員條氣
今年公僕加薪搞到好多公務員一肚氣，唔少公務員都覺得追唔上通脹。雖然今年加薪幅度已成定局，但公務員人工仲有一個調整機會，因為除咗每年都做嘅公務員薪酬趨勢調查外，每六年一次嘅公務員薪酬水平調查即將完成。公務員薪俸及服務條件常務委員會（薪常會）主席王英偉大派定心丸，講明唔會機械式應用調查結果，會考慮多項因素。
王英偉認同公務員的工作性質有獨特性。（資料圖片）
六月時幾大公務員工會炮轟公務員事務局局長鄧國威，話佢一味睇數字做人，唔知道公務員要受咁多氣，好辛苦。王英偉接受公務員事務局通訊專訪，就話好多公務員同佢反映，如果政府只將公務員同私營機構職位薪酬直接比較，咁樣唔係辦法。
王英偉話明白公務員工作性質有獨特性，同私人機構本質上有差異，所以呢次薪酬水平調查薪常會唔會機械式採用調查結果，而係會「人性化」加入多項因素同原則。照咁睇，公務員又唔使咁失望喎！
