政壇：慢必焗退出「人力」
人民力量近半年可謂風雨飄搖、波折重重，先有黃毓民宣布退出人力執委，同人力劃清界線；後有劉嘉鴻辭任主席，要由前港姐袁彌明臨危受命補上。尋日仲突然傳出消息，話立法會議員「慢必」陳志全都要退出人力，莫非慢必眼見人力仲未可以重振昔日光輝，所以想倣效勞工及福利局政治助理莫宜端，盡快跳船斬攬？
設計圖片及對白
我哋即時搵慢必求證謠言真偽，原來慢必要退出嘅唔係人民力量，而係立會轄下嘅人力事務委員會。慢必話，由於毓民退出人力，剩番兩個立法會議員，佢同「大舊」陳偉業要重新分配立會分工，所以佢要加入以前由毓民做代表嘅教育事務委員會，而大舊就會加入房屋事務委員會。
一人身兼七職
由於慢必已經身兼七個事務委員會委員，搞到分身不暇，所以惟有無奈退出人力事務委員會。佢仲話由於人力喺保安事務委員會都無代表，復會後如果唔算太忙，佢會加入埋保安事務委員會喎！
另外，由於人力唔係政黨，亦都無實行黨員制度，入面只會區分係執委定係支持者兩類，有時可能會令佢哋喺召集支持者時出現難度。慢必透露人力正密謀推行「會員制」，現有人力支持者只要登記成為「人力之友」，就會成為人力正式義工，方便日後分辨邊啲係真正嘅支持者，而邊啲係「掛名」支持者。佢仲話人力喺今個星期日會舉行支持者大會，到時會商討人力喺政改一役上嘅立場、佔中具體參與模式，以及組織架構改組等三大主題。
