SUN搞作：少膽虫手記：壹堆投訴信
壹全霉雖然讀者唔多，但最近竟然收到唔少讀者來信。小弟貴虫事忙，無親手拆信，大概內容都只係食千元lunch嗰陣聽美女助手匯報，不過美女總係輕抿粉唇，欲言又止，實在我見猶憐！是故，最錫靚女嘅少膽虫叫助手只講重點，美女吞吞吐吐咁話：「全部四字真言，叫人點講。」
入到房，淫黎發咗癲咁係咁拍枱，「弊喇！少膽虫，我哋無得放工喇！」「腦細，不嬲你就係道理，你想幾時放工咪幾時放工囉！」淫黎聽了，一巴冚落少膽虫度，「死蠢，有挑戰喇！我哋會撞到正o架！」「你話個颱風？唔一定咁正嘅，放心啦腦細！」說時遲那時快，淫黎又再兜巴星埋嚟，「死蠢，你快啲睇吓個『芒』啦！」
少膽虫摸住塊畀人打腫咗嘅臉，悻悻然咁爬向電腦，赫然發現淫黎開咗少膽虫個Mail Box，入面全部都係近期嘅來信，「誇張失實」、「淫黎收皮」等四字詞好似粗口咁連珠爆發，唔怪得美女助手驚到咁啦，「賤虫，唔係呢啲呀，你睇下面嗰封！」望去，但見上面寫住四隻大字：「壹股力場。」「原來壹全霉係一股力場，可謂天將降大任於斯人也！哈哈！我哋要利用呢股力場嚟頂住強大嘅正義傳媒！」淫黎興奮大叫，少膽虫睇真啲，原來下面仲有兩句，「齊心害港，垃圾傳媒」
「……腦細，人哋係鬧臭我哋。」唉，睇怕淫黎都係病到懵咗，唔係點會唔知壹全霉位處垃圾場唔係力場吖。
