城中鏡：陳恒鑌話溫哥華似元朗
陳恒鑌撇低囡囡到訪多倫多六日。
立法會議員Ben陳恒鑌星期日撇低囡囡，同幾位議員兼黨友衝上雲霄，到訪加拿大溫哥華同多倫多六日。不過，身處溫哥華嘅阿Ben不但冇掛住香港，仲越洋上載當地訪問嘅相，大讚「溫哥華好過香港」，移民當地適應方面應該唔成問題，就好似由市區搬入元朗咁。唔通佢想棄守新界西，移民加拿大？
陳恒鑌撇低囡囡到訪多倫多六日。
阿Ben喺社交網站fb話，溫哥華不但周圍都係港人，仲有好多港式美食同茶餐廳，講到「本土味」最強嘅要數當地傳媒，好似電台朝早有烽煙節目，連中午嘅加版《都市閒情》都同港版嘅廠景差唔多，當地華人電視台都有報道佢哋正身處溫哥華訪問，仲接受加版《都市閒情》專訪添！
不過，溫哥華話晒都係世界數一數二嘅宜居城市，香港淨係空氣質素都追唔上，加上阿Ben只係喺當地行咗轉唐人街，就以為加拿大通街都係香港人同茶餐廳。佢完成訪加之旅後，都係乖乖哋返港完成嗰三年議員任期兼陪囡囡好過喇。
