城中鏡：姜大偉出山教投資功夫
打功夫同投資有乜共通處，等姜大偉師傅教吓你。（資料圖片）
金融市場內咁多投資產品，需要時刻保持警惕，磨利把刀先搵到真銀﹗
打功夫同投資有乜共通處，等姜大偉師傅教吓你。（資料圖片）
好多人細細個就睇姜大偉嘅功夫片，仲記得佢喺九三年版嘅《射鵰英雄傳之九陰真經》裏面演黃藥師呢個角色，亦正亦邪真係好好睇，唔知係咪佢之前拍嘅保險廣告，嗰句「再鋒利嘅刀都有生銹嘅一日」令人印象深刻，近期由證監會出資成立嘅投資者教育中心，都搵咗佢重出江湖，拍成八段短片，一於以功夫會友，介紹投資技巧。
唔好以為打功夫同投資大纜都扯唔埋，其實兩者都要打好根基，先可以穩中求勝！上網睇過啲片，除咗基本嘅投資概念，仲會講埋認股證、高息債券基金呢啲較複雜嘅工具。市場上有咁多金融產品，一般投資者又真係好難理解得晒，得閒跟姜師傅學番一招半式，真係唔打得都睇得！
